Qubada avtomobil yollarının qışa hazırlığı yekunlaşıb-Video

26 Noyabr 2019 15:42

Qubada avtomobil yollarının qışa hazırlığına oktyabrdan başlanılıb. AAYDA-nın 5 nömrəli Yol İstismarı idarəsinin bazasına 2 min kub  qum, 80 ton duz tədarük olunub. Artıq qum duz qarışığının yarıdan çoxu idarənin balansındakı yolların eniş-yoxuş hissələrinə daşınıb. Bununla yanaşı qarlı hava şəraitində istifadə olunan texnikalar hazır vəziyyətə gətirilib. İşçi qrupları yaradılıb.

Bölgənin ən təhlükəli avtomobil yollarından sayılan 57 km-lik Quba-İspik-Xınalıq yolunda qışa hazırlıq yekunlaşıb. Yolda nəqliyyatın hərəkətində problemin yaranmaması üçün 18 nəfərlik növbətçi briqada yaradılıb. Yolun eniş-yoxuş hissələrinə 760 kub qum duz qarışığı tökülüb. Lakin  sükan sahiblərinin qarlı havada bu yoldan istifadə etməsi məsləhət görülmür.

İdarə 245 km yerli, 17 km respublika əhəmiyyətli avtomobil yoluna xidmət göstərir. Yolların buz və qardan təmizlənməsi üçün  10-dan çox texnikanın  və  işçi qruplarının əməyindən istifadə olunur.